មនុស្សម្នាក់ស្លាប់និងម្នាក់ទៀតរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងម៉ូតូនិងម៉ូតូ
17-September-2018 | ដោយ ពលមនសិការ
កណ្ដាល៖បុរសម្នាក់ស្លាប់ក្នុងថ្លុកឈាមយ៉ាងអណោចអធ័ម រីឯម្នាក់ទៀតទទួលរងបួសធ្ងន់ ក្នុងហេតុការណ៍គ្រោះថ្នាក់ចរាចរណ៍មួយរវាងម៉ូតូនិងម៉ូតូបុកគ្នាពេញមួយទំហឹង កាលពីរសៀលថ្ងៃអាទិត្យទី១៦ ខែកញ្ញា ឆ្នាំ២០១៨ នៅលើកំណាត់ផ្លូវលេខ៣៨០ ស្ថិក្នុងភូមិអាត់លើ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល។
មន្ដ្រីនគរបាលចរាចរណ៍ស្រុកខ្សាច់កណ្ដាលបានឲ្យដឹងថា បុរសស្លាប់បាត់បង់ជីវិតនោះឈ្មោះ ប៊ន ចាន់ថុន អាយុ៣៦ឆ្នាំ ជនជាតិខ្មែរ មុខរបរកសិករ មានទីលំនៅភូមិស្វាយអាត់ក្រោម ឃុំព្រែកតាមាក់ ស្រុកខ្សាច់កណ្ដាល ជាអ្នកបើកបរម៉ូតូធុនសេ១១០ ពណ៌ក្រមហម គ្មានស្លាកលេខ។ បុរសម្នាក់ទៀតរងរបួសធ្ងន់នោះពុំទាន់ស្គាល់អត្ដសញ្ញាណនៅឡើង ជាអ្នកបើកបរម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ 2GE-9071។
ប្រភពដដែលបន្ដថា នៅមុនពេលកើតហេតុ សាក្សីបានឃើញម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ មួយគ្រឿងខាងលើនេះបើកបរតាមបណ្ដោយផ្លូវលេខ៣៨០ ក្នុងទិសដៅពីត្បូងទៅជើង ដោយល្បឿនលឿន ខណៈដល់ចំណុចកើតហេតុ បានជ្រុលចង្កូតទៅបុកជាមួយម៉ូតូធុនសេ១១០កូរ៉េ ដែលកំពុងបើកបរច្រាស់ទិសគ្នាពេញមួយទំហឹង ធ្វើឲ្យម៉ូតូទាំង២គ្រឿង ដួលបោកទៅលើផ្លូវ បណ្ដាលឲ្យបុរសជាអ្នកបើកបរម៉ូតូធុនសេ១១០កូរ៉េ បោកក្បាលស្លាប់យ៉ាងអណោចអធ័មក្នុងថ្លុកឈាម រីឯអ្នកបើកម៉ូតូធុនសេ១២៥រងរបួសធ្ងន់។
ក្រោយពីមានហេតុការណ៍កើតឡើងសមត្ថកិច្ចនគរបាលស្រុកខ្សាច់កណ្ដាល បានចុះទៅអន្ដរាគមន៍ហៅរថយន្ដសាមុយដឹកជនរងគ្រោះបញ្ជូនទៅសង្គ្រោះនៅមន្ទីរពេទ្យ ចំណែកឯសាកសពជនរងគ្រោះម្នាក់ទៀតត្រូវបានប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យធ្វើបុណ្យតាមប្រពៃណី។បច្ចុប្បន្ន ម៉ូតូទាំង២គ្រឿងត្រូវបានបញ្ជូនទៅរក្សាទុកនៅអធិការដ្ឋាននគរបាលស្រុកខ្សាច់កណ្ដាលដើម្បីកសាងសំណុំរឿងចាត់ការតាមនីតិវិធីច្បាប់៕
ចំនួនអ្នកទស្សនា
- ថ្ងៃនេះ16281
- ម្សិលមិញ11441
- សប្តាហ៍នេះ46111
- ខែនេះ161261
- ឆ្នាំនេះ161261
- សរុប20603717